Mizoram pum huap Boxing inelna liam tham- Mizoram State Boxing, Championship, Inter District Boxing Championship leh Mizoram Open Boxing Championship ah te Gold Medal hnek chhuak ṭhintu- Sanpoh rawlthar, Hmingsawilaia fapa, Justin M. Lalthanpuia a rawn lang e. 

A ni hi Sub Junior boxing level ah mithar a ni lova, kumin March thla-a Sub Junior National Boxing Championship, Uttar Pradesh a neih zawh taka Mizoram tana Gold hnek chhuaktu kha a ni.

Justin-a hian duhsaktu a nei a, a talent neih hrechiangtu boxing coach Lalfakzuala enkawlna Sports Authority of India (SAI), Lunglei-ah kum 2022 aṭangin a awm a, tunah hian Shillong-a Assam Regiment Army Boy’s Training Center ah a awm mek a, hetah hian boxing bakah zirna a chhunzawm bawk a, class X hi open school ah admission a ti bawk.

Chhungkaw khawsak nuam sa aṭangin bul a ṭan lova, a chet velna tur atana sum pai ngai tur angte pawh an neih ṭhin loh thu a Pa chuan a sawi a, “Kan khawsak dinhmun hi a la pan lutuk a, zirna lam ah a chawlh kan phal si lo,” Justin-a Pa, Hmingsawilaia chuan a ti.

Justin-a biak pawh kan tuma, amah kan biak theihloh avangin Zoram Today chuan Justin-a Pa, Hmingsawilaia a be fuh thei a, zawhna chhangin, “Army Boy’s Training Center, Shillong aṭanga India camp, Karnataka a zuk zawm dawn pawh khan, buaipuitu a nei miah lo a, amah khan a che chhuak tawp a, tawng dang a lo thiam tha si lo, lo dawng sawngtu pawh a nei lova, a mak chu ka ti khawp mai,” a ti.

"India aiawha tel tur ni si kha, buaipuitu a nei lo a, a kal man senso vel chu keimahni in kan tum a, nakina sorkar-ah re-imburse leh tur an tiin ka hria,” a ti.

India aiawh turin India Camp a zawm fel a. “An hotu ṭhenkhat te’n midang dah luh tumin ka fapa hi a theihna na-ah paih an tum thin a, mahse Pathian zarah a tumruhna te an hotu dangte’n an hmu a ni ang, India aiawha tel turin training a paltlang ta a, Pathian awmpuina a chan theihnan min tawngtai pui turin ka ngen che u,” a ti bawk.